ساعدينى بقلم ندى ناصر

عنه تقصد طبق الرز بلبن اللي اشتريته ليا ولا كوباية عصير القصب اللي عزمتني عليها
_ للدرجة دي نسيتي
_ أنا نسيتك إنت شخصيا كنت بتقولي بقى أسامحك وأنا موافقة بس قبل ما أسامحك عاوزاك تقولي أسامحك على ايه.
_ بلاش طريقتك دي انتي عمرك ما كنتي كده.
_ ده زمان لكن دلوقتي أنا ورد تانية كبرت وفهمت وتفكيري نضج الأول كنت بسامحك من غير عتاب بمجرد مابتقولي وحشتيني ومش بتديني فرصة اتكلم وبتقلب الطرابيزة عليا وتحولني من مظلومه لظالمة لكن دلوقتي بقى أنا اللي هتكلم..

_ فاكر لما عايرتني وقللت من كتاباتي
_ طب فاكر لما اتريقت على شكلي اللي ماليش أي تدخل في خلقه
_ لما كنت تيجي عليا وتسيبني زعلانة باليوم والتاني والأسبوع والشهور وتيجي تقولي حقك عليا حقك عليا دي وقتها كانت بترد فيا الروح لأن ببقى فعلا مڼهارة ومش قادرة اتأقلم وعاوزاك جانبي وبس.
_ أكيد برضو فاكر يوم ما فضلت اتذلل عليك وجيتلك مكان شغلك عشان تقبل نرجع لبعض وأنت رفضت وقولتلي اللي زيي مينفعش يكون عايش وسطكم وسيبتني ومشيت وكان السبب ايه مش عارفه.
_ عمرك ما هونت عليا والحاجه اللي بتقدمها ليا هي معلشي هتعدي معلشي كلنا فينا هموم الدنيا
_ لما اقولك تعبانه مش هقدر اشوفك تقولي ليه بتشتغلي وضهرك مقطوم ولا بتعملي ايه يعني حتى تعبي كان بيهون.
_ كنت اقفشك بتكلم بدل البنت اتنين وعشرة وبسبب اني بحبك بسامحك.
_ وفجأة اختفيت من حياتي بلوكات من كل مكان غيرت بيتك وجميع إميلاتك وكنت بتعرف أخباري كلها أكيد أول بأول زي ماعرفت إن النهاردة خطوبتي عرفت إني عيشت أسوء ايام حياتي من بعدك لكن اللي متعرفوش إن انت مش اول ولا آخر رجالة العالم...
قللت من كتاباتي وبقيت أشهر كاتبة بشهادة أكبر الكتاب كمان قللت من شكلي اللي ربنا خلقه جالي واحد مش شايف ولا بنت غيري قللت تعبي وحزني ربنا عوضني بشخص عمره ما مل مني ولا من تعبي وبيهون عليا بالفعبل قبل الكلام...
بعدت من غير سبب مع السلامة ودلوقتي انت لو قدامي أنا هحط دبلتي في عيونك وأقولك إني ندمت إني عرفتك ومش محتاجة لوجودك المتعب استغربت اني لابسة فستان أحمر وانت عارف اني مش بحب اللون الأحمر حاليا مش بحب غير الأحمر حاجات كتير اتغيرت من بعد مانت مشيت من حياتي ومن غير سبب...
أنا في اليوم اللي تعافيت منك فيه نجحت سجدت لله وحمدته إنك مش في حياتي لأنك لو كنت فيها صدقني ماكنتش هعمل اي انجاز افتخر بيه ولا كان هيبقى سابق اسم ورد لقب الكاتبة وبعد كل ده جاي بعد أربع سنين بتقولي أسامحك
_ أنا مش متخيل إن جواكي ليا كره بالطريقة دي أنا آسف وبتمنى تسامحيني مش هقدر أقول غير كده كنت فاكر إني لما ارجع هتفرحي لكن للأسف مش ده اللي توقعته خالص انتي فعلا اتغيرتي.
شوفت المسدج الأخيرة منه وقبل ما اعمل بلوك سيبتله مسدج
_ لو بينك وبين الجنه اني اسامحك عمري مهسامحك
عملت بلوك وحذفت الشات وبعد أربع سنين عيشتهم بين تعب وحزن النهاردة نمت مرتاحه والإبتسامة على وشي وصوت ام كلثوم بيرن في وداني وهي بتقول
اتغيرت ومش بإ يديا وبديت أطوي حنيني اليك
وأكره ضعفي وصبري عليك واخترت ابعد وعرفت أعند حتى الهجر قدرت عليه شوف القسۏة بتعمل إيه
حكاوي_ورد.
ل ندى ناصر.
تابعوا القصه السادسه
_ معحبة بواحد بمجرد ما شوفتيه في الحلم
_ بصراحه بقى آه ومش قادرة أبطل تفكير فيه نفسي فعلا يكون موجود والاقيه وحلمي يتحقق.
_ ده انتي فاضية.
بصيت ليها وإبتسمت مسكت شنطتي وأخدت كل مستلزماتي اللي هستخدمها وانا بره وهي كانت لسة بتتكلم وواخدة كل كلامي بتريقة وضحك.
_ انتي رايحه فين
_ نازلة تيجي
_ ايوا نازلة ليه ومن امتى بتنزلي بالطقم الأسود ده
_ أصل اللي كان معايا في الحلم لابس اسود بقولك ده سحرني بجماله وجمال اللون الاسود عليه
تصدقي بالله ده حتى رجعلي شغفي للحياة.
_ من مجرد حلم
_ من مجرد حلم وسعي بقى خليني أنزل.
زقيتها على السرير وأخدت موبايلي وخرجت وقفت قصاد الأسانسير لكنه كان عطلان فأخدت السلم على رجلي لحد الدور الرابع كانت مستنياني فيه شهد.
_ اتأخرت
_ ده الطبيعي بقالي خمس دقايق واقفة اتأخرتي ليه
_ أصل كنت بحلم.
_ والله سيباني واقفة على السلم عشان تقوليلي كنت بحلم!
_ تعالي بس ننزل قبل ما بابا يقفشنا وهحكيلك في الطريق.
بعد نص ساعة وصلنا مكاني المفضل وقفت قدامه وفردت دراعي الهوا وأخدت نفس طويل وبعدين فتحت عيوني على صوت شهد.
_ هتفضلي معلقاني كده كتير ما تقولي حلم ايه اللي مصممة تحكيه على البحر ده
_ تسمعي عن الحب من طرف واحد لكن من غير ما الطرف التاني يشوفك ولا
يتكلم معاكي وانتي ذات نفسك مش عارفه هو موجود ولا لا
_ يعني ايه
_ يعني أنا حبيت الشخص اللي حلمت بيه.
كان جميل وأبيض وطويل